Хоббины ничек сайларга?

Тик хобби уку белән бәйләнешле түгел, бөтенләй башка юнәлештә булсын. Әйтик, бәйләү, чигү, тегү, фотога төшерү, велосипед­та йөрү һ.б. Әнә күпме алар - ул шөгыльләр. Алар синең иҗади фи­керләвеңне, интуицияңне үстерергә, төрле хәлләрдә яңа чишелешләр та­барга ярдәм итәр.

Хоббины ничек сайларга соң?

Башта үзеңә сорау бир: «Мине нәр­сә кызыксындыра? Минем харак­терыма нәрсә җитми?» Әгәр синең башлаган эшне ахырына җиткерер­гә түземлегең җитми икән, чигү, бәй­ләү белән шөгыльлән. Чөнки алар нәкъ менә түземлек таләп итәчәк. Бу исә синең характерың башка як­ка үзгәрә ала дигән сүз. Сине өйдән тартып чыгарып булмый, компьютер каршында утыруыңны дәвам итә­сеңме? Җитте, хәзер үк турклубка языл, фотога төшерү, велосипедта йөрү белән шөгыльләнә башла. Сиңа күбрәк кешеләр янында бу­лырга, аралашырга кирәк.

Оялчан, йомык кешеләргә хобби яңа танышулар алып килергә мөм­кин. Яраткан шөгылең, яңа фактлар, яңалыклар турында сөйләп, үзең дә сизмәстән, башкаларның игътибарын җәлеп итәсең бит. Төрле күргәзмә­ләргә йөреп, тематик сайтларга ке­реп, бик күп дуслар таба аласың. Ә кем белә, бәлки, нәкъ менә күргәзмә­дә син үзеңнең булачак мәхәббәтең­не очратырсың.

Исеңдә тот: хобби кайвакыт кешенең алдагы тормы­шына, профессия сайлауга этәргеч була. Газета-журналларга мәкаләләр язган кешеләр университетның фи­лология яисә журналистика бүлеген сайлый. Аннан инде төрле газета-журнал, телевидение редакциялә­рендә үк эшли башлый. Бизәнү әй­берләре: алкалар, муенсалар, белә­зекләр ясау белән мавыгучылар исә уку йортының дизайнерлар әзерли торган бүлегенә бара.

Хоббиең белән кызыксынучы­лар булса, аларга юнәлеш бирә, яр­дәм итә аласың. Уртак хоббилы ке­шеләр әнә шулай туплана да инде. Син алар белән төрле темаларга ки­ңәшләшә, сөйләшә аласың. Менә, үзең дә сизмичә, яңа дуслар таптың бит!

Әгәр син нәрсә дә булса тегә, бәй­ли аласың икән, туганнарыңның, иптәшләреңнең туган көннәренә курыкмыйча үзең бәйләгән баш­лык, шарф йә булмаса чигелгән матур кулъяулык, мендәр тышы бүләк итә аласың. Бу якыннарың­ны, һичшиксез, сөендерер, чөнки син ул бүләкләргә күңел җылың­ны салдың, бөтен тырышлыгыңны куйдың бит. Кибеттән алынган фо­то кысасына, китапка караганда, кулдан бәйләнгән башмаклар, чи­гелгән яулыклар кадерлерәк.

Сизәсеңме, хобби сиңа күпме яңалык алып килде: яңа танышлар, яңа халәтләр, яңа мәгълүматлар. Яшәү рәвешең дә күңеллеләнеп киткәндер. Тик шулай да хобби си­нең төп эшеңә зыян салырга тиеш түгел. Син - укучы, шуңа күрә бөтен вакытыңны яраткан шөгылеңә генә багышлама.

Һаман хобби сайлый алмаучыларга чикләр юк. Агач эшләре белән шөгыльләнергә, рәсем ясарга, җыр­ларга, биергә була. Күңелеңә якы­нын курыкмыйча сайлый аласың. Белгечләр раславынча, нәрсә белән дә булса шөгыльләнүче кешеләр хроник авырулар белән сирәк авы­рый.

«Матур буласың килсә...» кызлар энциклопедиясеннән. 2011.

«Кызлар колагына» рубрикасы буенча яңалыклар