Татарстанда «Үлемсез полк» акциясен онлайн уздырырга планлаштыралар

«Үлемсез полк» халыкара иҗтимагый акциясе онлайн узарга мөмкин. Бу куркынычсызлык максатларында эшләнә, дип белдерде коронавирус инфекциясе таралуга каршы көрәш буенча республика штабы җитәкчесе – Татарстан Республикасы Премьер-министры урынбасары Ләйлә Фазлыева.

«“Үлемсез полк“ ны онлайн-режимда интернетта уздырырга мөмкин. Мин киләсе атнада төгәлрәк хәбәр итәчәкмен", - дип сөйләде Фазлыева.

Татарстан районнарында Җиңү көне уңаеннан уза торган чараларны да үткәрмәскә планлаштыралар. Әмма һәр район җитәкчелеге 9 майга һәйкәлләрне һәм монументларны тәртипкә китерергә, соңыннан аларга чәчәкләр салырга тиеш.

"9нчы майда әлеге чаралар парад яки кешеләр җыю рәвешендә үткәрелмәячәк. Без 9 май көнне үткәрә алган бердәнбер чара – ТР районнарында урнашкан һәйкәлләргә һәм мемориалларга чәчәкләр салу тантанасы. Аны район башлыгы катнашында, бәлки, берничә волонтер белән үткәрербез", - дип билгеләп үтте Фазлыева.

Бәйрәм хөрмәтенә Татарстанда концертның ике сәгатьлек телевизион версиясен әзерлиләр, ул иртән һәм кичен трансляцияләнәчәк һәм салют белән тәмамланачак.

Бөек Җиңүнең 75 еллыгына багышланган «Без – тынычлык чоры балалары» иҗади бәйгесендә катнашыгыз.