"Әниемнең вафатын бик авыр кичердем. Шулай да, тормыш дәвам итә..."

"Әниемнең вафатыннан соң инде ел ярым үтте. Бик авыр кичердем. Хәзер, ниһаять, янып-көеп яңа җыр яздырырга йөрим.

Нигәдер бу җырны шундый зур дулкынлану белән әзерлим. Бәлки, иҗатыма икенче сулыш бирә торган җыр булыр бу. Бәлки, тамашачы күңеленә дә бик хуш килер, ә бәлки мине көйләр авторы буларак та яңа баскычка күтәрер... Өметләр зурдан!", - дип яңалыклары белән уртаклашты Нурзадә.

Җырчы мәдәни тормыштагы һәр яңалыктан хәбәрдар булырга тырыша. Китаплар укый, татар әдәбиятын даими укып бара икән. Тарихи әсәрләрне аеруча яратуын сөйләде Нурзадә. "Хәлемнән килсә, Сөембикә-ханбикә, Казан ханнары турында фильм төшерер идем", - диде ул.

Җырчыга иҗатында зур уңышлар телибез. Теләк-ниятләре чынга ашсын, берүк!