Сары утлар

Сары утлар
Һәрбер өйнең кешесен саныймын,
Арткан саен эзләр сөенәм.
Авылым урамыннан атлыймын, 
Ут элмәсә, эчтән көенәм.

Сары утлар күренә трассада,
Йөрим кайбер кичен авылда.
Дөм караңгы авыл – ул шахтада,
Дәһшәтлерәк тә ул давылда.

Туры килә кайбер мәл шәһәрдә,
Шәһәрдә, юлларда булырга,
Сары утлар якты, тик күңелдә
Гел тотына давыл уларга.

Сары утлар күренә трассада,
Күңел тели барырга шунда.
Аңламыйм сине йөрәк вообще да
Кайда син тыныч йөрәк, кайда?

Иҗат
Ботакларын юна-юна,
Салам мин үземчә күпер.
Елга-дәрья, киң һәм тирән,
Күпме кеше синнән үтәр.

Ниләр кирәк күпер өчен:
Кирәк аң, каләм – балта, сап;
Чыгу өчен елга аша,
Кирәк күп вакыт – бихисап.

Кирәк тирәк, теләк, терәк.
Кирәкләре аның бик күп.
Барырга зәһәр җилләрдә
Табигатьнең ачысын үп.

Кем салган? Нигә? Нәрсәдән?
Төзелгәч, булыр сораулар.
Үтә гади шул җавабым:
Күпер – үз күңлемне саклар.

Хыял – иҗат, күпер - сезгә,
Хәзер көтәсе җавапны.
Бәя куйсагыз да беләм,
Иҗат итү – ул саваплы.