Көмеш кыңгырау

Республика балалар һәм яшүсмерләр газетасы

18+
2024 - Гаилә елы
Кызлар колагына

Чәчләрне карыйбызмы?

Дөресен әйт, синең дә башыңа чәчләреңне буяп карау турында уйлар килгәне бар бит?

Иптәш кызларыңның чәчләрен буяп, төрле прическалар ясап ки­лүенә ияләнеп беттең. Әнә парал­лель сыйныфта укучы Алинә көн саен бер «мөгез чыгара»: йә аның чәче кап-кара һәм таратылган, йә сарыга буяп, үреп куелган. Ничек коелмыйлар икән ул чәчләр дип кызганып та куясыңдыр әле. Парта­дашың Гүзәл исә, киресенчә, коңгырт кара чәчләрен бер дә буямый, ә менә прическаларны һәрвакыт төрләнде­реп тора. Чәченең буялмаган булу­ына бер дә исе китми аның.

Дөресен әйт, бу яшьтә синең дә башыңа чәчләреңне буяп карау турында уйлар килгәне бар бит? Көзге алдына килеп, «әгәр мин сары яки кара чәчле булсам, журналдагы чит ил актрисасыныкы кебек иттереп сарылы-аклы төсләргә буясам» дип хыялланганың да бардыр әле, шу­лаймы? Бу бик табигый. Синең яшьтә кызлар үз имиджларына күб­рәк игътибар бирә башлый, һәр яңалык аларны кызыктыра. Чәчлә­реңнең төсен үзгәрткәч, гел икенче кеше булырсың кебек, шулаймы? Тик башта уйлап кара әле, бик ки­рәкме соң сиңа ул буяулар? Имидж-ны чәчләрне буямыйча да үзгәртеп була бит: төрле прическалар ясап, матур кыстыргычлар, тасмалар та­гып кара. Чәчләреңне көн саен кой­рыкка җыеп йә таратып йөрисеңме? Ә син аларны матур итеп үрергә, төрле тасмалар белән бәйләргә ты­рышып кара. Бөтенләй икенче төр­ле булдың, шулаймы? Чәчләреңне химик буяулар белән бозу кирәк тә түгел икән.

Синең яшеңдәге кызларга без чәч буяулары кулланырга киңәш итмәс идек. Чәчеңнең табигый төсе дә сиңа бик килешә бит. Юри генә урамнан үткәндә игътибар ит: бик азлар гына үз чәчләренең төсен сак­лап калган. Аларның йомшак, нәфис чәчләренә сокланып карыйсың. Әйе, буяудан соң чәчләр каты, коелучан, кайвакыт үлегә дә әйләнергә мөм­кин. Шуңа күрә чәчеңне буярга ашыкма, табигать биргән матурлы­гыңны сакларга тырыш. Бу бүлектә без чәч төрләре, аларны карау, при­ческа ясаганда ярдәмгә килүче кос­метик чаралар турында сөйләшербез.

Нинди генә прическа ясарга алынсаң да, исеңдә тот: чәчләр һәр­вакыт чиста һәм каралган булырга тиеш. Моның өчен аларны шампунь белән юып торырга кирәк. Ул чәч­ләрне пычрактан, майдан, тузаннан арындырудан тыш, йомшак, ялтыра­вык, шома итә. Тик шампуньны дө­рес сайлый белергә кирәк, аңа кадәр син чәчләреңнең кайсы төркемгә керүен ачыкларга тиеш.

Нормаль чәчләр. Алар, гадәттә, шома, икегә аерылмый торган була­лар һәм сынмыйлар да. Мондый чәчләр озак юмый торганда гына майланырга мөмкин.

Коры чәчләр икегә аерылалар, сыналар, чуалалар һәм бөтенләй ял­тырамыйлар.

Майлы чәчләр юганнан соң икенче көнгә үк майланып чыгалар, ямьсез кыяфәт алалар.

Проблемалы чәчләр — ясалма чәчләр кебек төссез чәчләр, еш кое­лалар.

Һәр төркем чәчләр өчен аерым шампуньнар бар, шуңа күрә, сатып алганда, аларның язуларын игъти­бар белән укы. Чәчләрне шампунь белән юганнан соң, кондиционер куллану да мөһим. Ул чәчләрне чуа­лудан саклый, тукландыра. Гадәттә, кондиционер кулланганнан соң, чәчләр ялтырап тора. Кондиционер­лар чайкагычлар (опаласкиватель), майлар, бәлзәмнәр рәвешендә бу­лырга мөмкин.

Чәчләрне кайнар суда юарга яра­мый, чөнки кайнар температура май бизләре эшчәнлеген көчәйтә, һәм чәчләр тиз арада майлана, аларның структурасы бозыла. Чәчләрне та­бигый юл белән дә, фен белән дә киптерергә ярый, тик соңгысы белән мавыкма, даими кулланганда, ул чәчләрнең сынуына, коруына ки­терә. Хәзер чиста, кипкән чәчләргә прическа ясарга менә дигән вакыт. Моның өчен сиңа чәч лагы, кцбек (мусс), чәч геле, балавыз (воск) һ.б. кирәк булыр. Әгәр синең чәч­ләрең бөдрә икән, курыкмыйча мусс куллана аласың. Учыңа кысып чы­гарган күбекне әз-әзләп чәчләреңә сыла, ул ал арның формасын саклар­га мөмкинлек бирә. Күп кенә кыз­лар «юеш эффект» ясарга яраталар. Моның өчен чәчләрең юеш чакта, ал арга гель сыла, тик арттырып җи­бәрмә, чөнки кипкәч алар балавыз сыман келәйле булып калырга мөм­кин. Бу исә бер дә син көткән нәти­җә булмас. Чәч лагы иң ахырдан, ясалган прическаны саклау, берке­теп кую өчен кирәк. Аны да артык күп сипмә, чөнки чәчләрең таш ке­бек катып китәргә һәм ясалма бу­лып күренергә мөмкин. Чәч лагын шулай ук теге яки бу прическаны ясаганда, аерым чәч тотамнарын бер­кетү өчен дә кулланалар.

Прическаларның үзеңә ошаган­нарын сайлый аласың, чөнки хәзер чәчләрең тәртиптә: чиста, сәламәт. Әнә, кирәкле чәч лагы, күбек, гель, балавыз да көзге алдында тора. Фантазияңне эшкә җик, бу бәйрәмдә син иң матуры, иң зәвыклысы, иң күркәме булырга тиеш.

Следите за самым важным и интересным в Telegram-каналеТатмедиа

Безнең телеграм каналга язылыгыз «Көмеш кыңгырау»


Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев