Чаллыда Шәүкәт Галиев исемендәге премия тапшыру тантанасы булачак

Татарстанның халык шагыйре Шәүкәт Галиев исемендәге премияне «ТАТМЕДИА» АҖ филиалы «Көмеш кыңгырау» газетасы редакцияcе һәм Татарстан Язучылар берлеге игълан иттеләр. 

Премиянең максаты – матбугат органнарының рухи тормышыбыздагы ролен күтәрү, яшь авторларыбызның активлыгын арттыру, газета битләрендә басылып чыккан язмаларның әдәби сыйфатын камилләштерү.

Быел Шәүкәт Галиев исемендәге әдәби-иҗтимагый премия икенче тапкыр тапшырыла. Әлеге премиягә 2020 ел дәвамында «Көмеш кыңгырау» газетасы белән актив хезмәттәшлек иткән бер өлкән авторга һәм кызыклы шигырьләре, хикәяләре, журналистик язмалары дөнья күргән дүрт укучы бала лаек булачак.

Бүләкләү тантанасы 12нче апрель көнне 11.00 сәгатьтә Чаллы шәһәренең үзәк китапханәсендә була.

• Беренче премия лауреатлары - язучы Рәшит Бәшәр,Чаллының 41нче мәктәп укучысы Роза Әмирова, Балык Бистәсе районы Күгәрчен мәктәбеннән Әдилә Мингарипова белән Инсаф Гатауллин һәм Мамадыш районы Кече Кирмән авылыннан Әмир Фәрхуллин. Тулырак: http://chelny-rt.ru/news/il-yaalyklary/challyda-shkt-galiev-isemendge-dbi-itimagyy-premiyane-tapshyru-tantanasy-tte