Зөфәр Хәйретдинов көеТатар халык сүзләре
 

Җырла, җырла, дип әйтәсез,
Сезгә нинди җыр кирәк?

Әй, сезгә нинди җыр кирәк?
Ай җаный, вай җаный,
Сезгә нинди җыр кирәк?
Сезнең өчен җыр җырларга
Сандугач теле кирәк.

Өфе — Казан юлларының
Баганалары чыршы,

Эх, баганалары чыршы.
Башларыңа моңнар төшсә,
Сез дә булырсыз җырчы.

Безнең юллар куе үлән,
Карап үтәргә кирәк,

Әй, карап үтәргә кирәк.
Җыр белмәгән, җыр сөймәгән
Безнең татарда (Казанда) сирәк.

Ай май үтә, май үтә,
Май үтә дә җәй җитә,

Эх, май үтә дә җәй җитә.
Май үткәнгә кайгырмагыз,
Безнең яшь гомер үтә.
Ай җаный, вай җаный,
Безнең яшь гомер үтә.

Бу җыр Хәмдүнә Тимергалиева репертуарында бар

Ай җаный, вай җаный (икенче вариант)

Зөфәр Хәйретдинов көеТатар халык сүзләре

Җырла, җырла, дип әйтәсез,
Сезгә нинди җыр кирәк?
Әй, сезгә нинди җыр кирәк?
Сезгә нинди җыр кирәк?
Сезнең алда җыр җырларга
Сандугач теле кирәк.

Егет Идел буйларында,
Гармуны кулларында.
Бөгелә-сыгыла гармун уйный
Кем икән уйларымда?
Ай җаный, вай җаный,
Кем синең кулларыңда?

Урталарда йөргән чакта
Әйләнмиме башларың?
Язарга торган каләм кебек
Синең кара кашларың.

Безнең юллар куе үлән,
Карап үтәргә кирәк,
Әй, карап үтәргә кирәк.
Җыр белмәгән, җыр сөймәгән
Безнең Чаллыда (шәһәрдә) сирәк.

Җырла, җырла, дип әйтәсез,
Җыр чәчкәнең бакчага.
Әй, җыр чәчкәнең бакчага
Җыр чәчмәсәң дә бакчага
Сатып алдым акчага.

Өфе — Казан юлларының
Баганалары чыршы,
Башкаеңа моңнар килсә,
Син дә булырсың җырчы.

Әй, май үтә, май үтә,
Май үтә дә җәй җитә,
Әй, май үтә дә җәй җитә.
Май үткәнгә кайгырмагыз,
Безнең яшь гомер үтә.
Ә-ә-әй!

Бу җыр Гөлүзә Зиятдин репертуарында бар
Чыганак: http://erlar.ru/node/5058