Гитара кызларга да килешә!
«Көмеш кыңгырау»ның икенче саны чыкты! Беренче биттә - Актаныш кызы Әдилә Ибәтуллина белән әңгәмә.
Әдилә – безнең актив хәбәрчебез ул. Иҗат итә, гитарада уйный, волейбол-баскетбол белән шөгыльләнә, бию түгәрәгенә йөри... Үзе чып-чын авыл кызы – Актаныш районы Пучы мәктәбендә укый.
– Ничек соң авылда? – дип кызыксынабыз без. – Авылны яратасыңмы, әллә күбрәк шәһәр кызыктырамы сине?
– Кызыктырса, барып торабыз бит. Каникул вакытларын, ялларымны гел шәһәрдә үткәрәм мин. Сәүдә үзәкләрендә, паркларда, тарихи урыннарда йөрергә яратам.
– Гитарада үзлегеңнән уйнарга өйрәндеңме?
– Әйе. Әтием гитарада яшүсмер вакытыннан ук уйный. Миндә дә уйнарга өйрәнү теләге бар иде, ләкин тотынырга курка идем. Узган ел үземне кулга алып уйнарга өйрәндем. Иң зур хыялымны тормышка ашырдым.
– Язмаларың «Көмеш кыңгырау»да даими чыгып килә. Иҗат итү кызыкмы үзеңә?
– Миңа иҗат та, сәнгать тә, спорт та кызык.
– Мәктәбегездә нинди түгәрәкләр эшли?
– Волейбол, баскетбол, бию түгәрәге...
– Син барысына да йөрисеңме?
– Биюгә һәм волейбол түгәрәгенә йөрим. Һәм тагын бер яраткан шөгылем – гитара.
– Яшьтәшләреңә ниләр теләр идең? Әйдә, синнән өч теләк!
– Якын кешеләрең белән бергә бул, хыялларыңны чынга ашыр һәм һәрвакыт хәрәкәттә бул, – дияр идем.
– 2022 елдан Әдилә үзе ниләр көтә икән?
– Имтиханнарны яхшы билгеләргә тапшырасым килә...
– Уңышлар телибез сиңа, Әдилә!
Гөлинә Гусамова.
Блиц-сораштыру:
– Узган елның иң күңелле вакыйгасы?
– Гитарада уйнарга өйрәнү.
– Синең өчен иң кадерле бүләк?
– Янәшәдә дусларым булу.
– Үзеңне өч сүз белән бәялә әле...
– Мин тырыш, оптимист һәм үзсүзле.
Следите за самым важным и интересным в Telegram-каналеТатмедиа
Безнең телеграм каналга язылыгыз «Көмеш кыңгырау»
Нет комментариев