Укытучы баласы начар укый алмый!

Минемчә, бик авыр һәм җаваплы һөнәр бу. Алар, табиблар кебек үк, хаталар җибәрә алмый, чөнки киләчәк – алар кулында. Минем әти-әнием дә укытучылар. Әнием – рус теле һәм әдәбияты, ә әтием математика укыта. Укытучы баласы булу рәхәт дип уйлыйсыз мәллә сез?  

Беренчедән, әти-әниләрне өйдә очратуы кыен, чөнки алар күп вакытларын мәктәптә үткәрә. Еш кына ике смена эшләргә туры килә. Өйгә кич кенә кайталар һәм яңадан  мәктәп эшенә утыралар: көндәлек план язу, дәфтәр тикшерү...

Икенчедән, укытучы баласы начар укый алмый. Ничек инде, син бит укытучы баласы?! Сәбәпсез дәрес калдырам да димә, шундук әти-әниең беләчәк!

Өченчедән, укытучы баласы һәр яклап үрнәк булырга тиеш.

Аның каравы, әгәр мин материалны аңламасам, әти-әнием миңа, һичшиксез, ярдәм итәчәк, барысын да яңадан аңлатачак. Мин аларга теләсә нинди сорау белән мөрәҗәгать итә алам. Алар мине мөстәкыйль булырга, башкаларның фикерен хөрмәт итәргә өйрәтәләр. 

Минем әти-әнием күпме балага белем биргән. Алар хәзер үзләре дә төрле һөнәр ияләре. Әти-әнием янына килеп рәхмәтләрен җиткерәләр. Укытучы өчен бу иң зур бәя. Ә мин бу минутларда алар өчен шатланам.

Гомумән, мин укытучы баласы булуым белән горурланам.

Зәринә Хәкимова, Арча шәһәре.