6нчы сентябрь – кофелы туңдырма көне

Кирәк булачак:

1 бал кашыгы кофе порошогы,

2 стакан сөт,

4 аш кашыгы шикәр комы,

1 аш кашыгы крахмал,

2 йомырка сарысы.

Иң беренче эш итеп, шикәр комы белән сөтнең яртысын утка куярга кирәк. Шуңа бераз салкын су кушылган крахмал өстәп, берничә минут кайнатырга һәм плитәдән алырга. Йомырка сарысын яхшылап күпертеп (төсе агарганчы), ярты стакан салкын сөткә кушыгыз. Калган ярты стакан сөт белән кофены кушып кайнатыгыз, суытыгыз да алдан әзерләнгән катнашмалар белән кушыгыз һәм, формаларга салып, туңдыргычка куегыз. 30 минут чамасы торгач, татлы десерт әзер. Өстенә вак кыргычтан чыгарган шоколад та салсагыз, тел йотарлык була.