Без – нәни булышчылар!

Балаларга күмәк хезмәтнең әһәмиятен аңлату – балалар бакчасы тәрбиячеләренең максатларыннан берсе.

Шушы максаттан чыгып, безнең балалар бакчасында балалар белән төрле чаралар үткәрелә. Шуларның берсе - 4 нче мәктәпкә әзерлек төркеме балалары белән территорияне җыештыруда катнашу.

Балалар бу эшкә бик теләп алынды: һәркайсының эшләп карыйсы, үзеннән өлеш кертәсе килә. Бигрәк тә малайларыбыз өлгер! Алар бу эштән тәм һәм ямь табалар. Бергә эшләгәч, эшнең җиңелрәк булганын һәм тизрәк беткәнен аңлыйлар. Кирәк чакта бер-берсенә булышырга да онытмыйлар.

Җыештырып бетергәч, аларның йөзләрендә кәнагатьләнү хисләре чагыла. Чөнки үз эшләренең матур нәтиҗәсен күрәләр. «Бердәмлектә – көч» икәнен аңлыйлар. Мәктәптә укый башлагач та бу балаларда бердәмлек һәм дуслык хисләре сүрелмәс дип ышанабыз.

Чаллы шәһәре, 42нче "Алчәчәк"балалар бакчасы, Муратова Рәзилә Гависовна, Нуриева Әлфия Абузаровна, Халимова Ландыш Фаилевна.

Фото шәхси архивтан.