Кишер грипптан да файдалы

Кишер ашагач, авыз куышлыгы микроорганизмнардан чистара. Ангина, стоматит, грипп булганда, кишер согы белән авызны һәм тамакны чайкыйлар. 

Томау төшкәндә, 4 өлеш кишер согына 3 өлеш үсемлек мае, 1 өлеш сарымсак согы кушып, борынга тамызалар (көненә 3-4 тапкыр, өчәр тамчы).

Тавыш беткәндә, бер кишерне турап, ярты литр сөттә пешерәләр, сөзәләр, җылы килеш әз-әзләп кенә эчәләр, тамакны чайкыйлар. Кишер согының тәме ошамаса, 1 кисәк лимон салырга ярый.

Кишер согы йөрәк мускуының арыганлыгын баса, яшелчәдәге кобальт тозлары исә кан басымын җайга сала, гемоглобин ясалуны яхшырта, В12 витаминын эшләп чыгаруга булыша. Миокард инфарктыннан соң 2-3 атна үткәч үк, кишер согы эчә башларга ярый.

КИҢӘШЛӘРНЕ ТОТКАНЧЫ ТАБИБ БЕЛӘН КИҢӘШЛӘШҮ ЗАРУР!