Көмеш кыңгырау

Җәйнең бер көне

Бүген - 15нче июль, җәйнең кыл уртасы. Роберт Миңнуллинның шигыре шул турыда.

ҖӘЙНЕҢ БЕР КӨНЕ

Җәйнең бүген кыл уртасы,
Җәе тора чыңлап.
Җәйнең шушы эссе көне
Җәннәт төсле! Чынлап!

Җәй уртасы җем-җем итә,
Җәй уртасы гөжли.
Монда бар да хәрәкәттә,
Бар да нидер эзли.

Кырмыскалар, бал кортлары
Тотынганнар эшкә.
Чикерткәләр сикерешә,
Килеп төшә өскә.

Менә нәфис бер күбәләк
Килеп кунды чәчкә.
Гүя мин дә бер үсемлек,
Гап-гади бер чәчкә.

Йә булмаса, бер камка мин,
Ямь-яшел бер үлән.
Шуларның берсе икәнне
Мин үзем дә беләм.

Һәр үләннең үз бөҗәге,
Һәрберсе бер бизәк.
Аларга ят тоеладыр
Минем кебек бөҗәк...

Истән чыкты фани дөнья,
Онытылды кышлар.
Сайрашып ага чишмәләр,
Челтриләр кошлар.

Ул кошларның көйләрен мин
Беләм инде яттан...
Бер хәсрәте юк кешедәй
Рәхәтләнеп ятам!
РОБЕРТ МИҢНУЛЛИН

Фото Татар-информ сайтыннан.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: