Көмеш кыңгырау

Яр Чаллы шәһәре

Шигърият

Манзара

***

Сәер хәлләр карап тордым, 
Беленгәндә ал таңнар: 
Кочаклашып җырлашалар, 
Яр буендагы таллар. 

Кушымтада кушылалар 
Мәкам белән камышлар: 
Монда тудык, монда үстек, 
Тумыштан дип, танышлар. 

Яфрагың калтырый дип, 
Каен усакны әрли. 
Усак бер сүз дәшми тора, 
Әйтерсең солдат—хәрби . 

Тал- басмада чәчен тарый, 
Су анасының кызы. 
Аңа качып карап тора, 
Күлнең мут бер кондызы. 

Ата үрдәк йөз кычкырды, 
Ана җавап бирмәде. 
Ба-ак, ба-ак, диде, әгәр тотсам, 
Бирәм аның кирәген. 

Былбыл егет кочып үпте, 
Тургай кызын аулакта. 
Яратуы чынлап ахры— 
Оя корган колмакта. 

“Умырт-умырт”, диеп бака, 
Ни әйтергә телидер? 
Менә монсын аңламадым— 
Безнең телләр түгел бер. 

Офык алсу пәрдәләрен 
Тау артына тарттырды. 
Кояш чите күренүгә 
Туар көн дә яктырды... 
Роберт Сәлахиев.

Следите за самым важным и интересным в Telegram-каналеТатмедиа

Оставляйте реакции

4

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев