Көмеш кыңгырау

Июльнең утыз бере

Таһир Шәмсуаров.

Инде көзләр җитә димә,

Җәй яме белән йөре.

Урамда кояш кыздыра,

Июльнең утыз бере.


Сары яфрак - сагыш түгел,

Елмаюның бер төре.

Урман әле җәйләп ята,

Июльнең утыз бере.


Иртәләрен суытса да,

Табигать әле тере.

Чалгылар чүкеп яткан мәл,

Июльнең утыз бере.


Җылы яңгырда коен син,

Чыклы үләндә йөре.

Башкача мөмкин дә түгел,

Июльнең утыз бере!


Яшьлек җәе үтә димә,

Язларны дәшмә кире.

Күңелдән җәйләр китмәсен,

Июльнең утыз бере.


 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: