Ил өчен туалар малайлар

Ил өчен туалар малайлар

Әти-әнинең шатлыгы,

Көтелгән зур бәхет бит алар.

Кичә дә бүген дә шулай ул,

Ил өчен туалар малайлар.

Бу җирдә ватанның барлыгын

Тәпиләп киткәч тә тоялар.

Элгечтәге хәрби киемне

Кияргә ашыга малайлар.

Җиңү алып кайткан бабасын

Ел саен еш искә алалар.

Һәйкәлләр яныннан узганда

Баш иеп үтәләр малайлар.

Белегез, унике ай буе

Керфек тә какмыйлар аналар.

Тик исән-имин кайтыгыз,

Сагындык, көтәбез малайлар.

Мәңгегә бирелгән вәгъдәләр

Йөрәкнең түрендә яталар.

Тиң ярлар онытмый солдатын,

Ярата сөйгәнен малайлар.

Кичә дә, бүген дә ул шулай,

Ватанның терәге бит алар.

Тарихтан алынды бу сүзләр

Ил өчен туалар малайлар...

7.10.2019

Ерактагы якын бабам

Мәрмәр таштан укыйм исемеңне,

Бик сагынам сине мин менә.

Ерак бабам шундый якын миңа,

Җиңү алып кайткан илемә!

Мин сурәтен кулга алам аның,

Ерак әби көтә бүген дә.

Ап-ак чәчле улы - бабай елый

Елына бер җиңү көнендә.

Сиңа, миңа аяз күкләр теләп

Чит туфракта башын салган ул

Батырлыгы эзсез югалмаган,

Хәтерләрдә мәңге калган ул!

Кочагыңа килә сыенасым,

Бүген минем шундый чакларым.

“Өйгә кайт!” – дип хатлар язар идем

Үткәннәргә барса хатларым.

Мәрмәр таштан укыйм исемеңне,

Бик сагынам сине мин менә.

Ерактагы якын бабам минем

Җиңү алып кайтты илемә.