Рүзәл Мөхәммәтшин: "Һәлакәт корбаннарын да, шагыйрьнең үзен дә яд итү булсын"

"Беләсезме, «Чернобыль»ны мин дә карадым. Тәэсирләндерде. Күренекле шагыйрь Зөлфәтнең ерак 1989 елда ук язылган шигыре искә төште. Ләкин ни гаҗәп: сериалны күргәннән соң гына бу әсәр минем аңда барлык нечкәлеге, детальләре белән ачылып җитте... Графит кантарын моңарчы бөтенләй аңламаганмын, мәсәлән.
Һәлакәт корбаннарын да, шагыйрьнең үзен дә яд итү булсын, дим", - дип яза шагыйрь Рүзәл Мөхәммәтшин үзенең социаль челтәрдәге сәхифәсендә.

Буын

Азат кошлар булып килдек җиргә –
Барыбыз да ап-ак канатлы...
Нинди дәртле иде безнең учак! –
Кисәүләрен кемнәр таратты?

И замана!
Безгә иман булды
Иблис үзе әйткән «бисмилла»...
Нинди байрак үптек без тезләнеп?
Яшьнәдек кем гимны астында?

Җылыттыкмы инде кешелекне
Брак 
реактордай кабынып? –
И ашкындык алга,
Мөртәтлекнең
Графит кантарына абынып.

Без җырларга тиеш идек ләса
Азатлык һәм Сафлык турында! –
Иң нык дозиметр чыдый алмас
Безгә сеңгән
Ялган БЭРына.

...Юкса, 
болыннарда шул ук гөлләр...
Элеккечә таңнар аллана –
Гафу сорар көч кенә юк җанда
Һәм
Ярлыкар өчен
Алла да...

Бөек очыш өчен җәйгән идек
Горурланып ап-ак канатны –
Кем сүндерде безнең учакларны?
Кисәүләрен кемнәр таратты?

Без 
ничәнче буын кешелектә?
Безнең эзләр
Җирдән сөртелсен –
Без – реакторлар,
Без номерлы 
Җирдә,
Һәммәбезнең номер – 
дүртенче...

Зөлфәт, 1989 ел.

• «Чернобыль» (инглизчә Chernobyl) — 2019 елда АКШ һәм Бөекбритания тарафыннан төшерелгән тарихи мини-сериал , авторы Крэйг Мазин. Режиссёры -  Йохан Ренк.
• Сериал 1986 елның 26нчы апрелендә Чернобыль АЭСдә булган авария, халыкны зарарланган зонадан чыгару һәм фаҗиганең сәбәпләррен ачыкларга тырышу турында. Төп рольләрдә Джаред Харрис, Стеллан Скарсгорд, Эмили Уостон һәм Пол Риттер.
• Сериалның премьерасы 2019 елның 6нчы маенда АКШта һәм 7нче майда Бөекбританиядә булды.