Бер зарым юк сезгә, и кешеләр!..

Абынсам да бик еш, егылсам да, 
Еласам да шуңа үкереп, 
Чит-ят күзләр күреп өлгергәнче 
Тора алдым һәрчак сикереп. 

Пыскып янган өмет кисәвен дә 
Йөрәгемә төреп сакладым. 
Беркайчан да үзем өчен генә, 
Каен кисеп, учак якмадым. 

Балачакны баллы чәчәк дидем, 
Яшел таҗым дидем яшьлекне. 
Саф чишмәле гомер җәйләремдә 
Кушучлап гел эчтем бәхетне... 

Көзләремә, кышларыма керәм, 
Эзләремне күмәм җыр-моңга. 
Бер зарым юк сезгә, и кешеләр! 
Бер үпкәм юк сиңа, и дөнья!