Йолдыз апа бездә кунакта

Кичәдә алар Йолдыз апаның шигырьләрен сөйләделәр, җыр-биюгә осталыкларын күрсәттеләр. Шагыйрәнең дә үз шигырьләрен сөйләвен бик яратып тыңладылар. Йолдыз апа үзенең балачагы, ничек шигырьләр яза башлавы турында да сөйләде, кызыксындырган сорауларыбызга җавап бирде.

Йолдыз Шәрәпова балалар өчен дистәләгән китап авторы. Шагыйрәнең  һәрбер шигыре балаларны тәрбияли, алар күңеленә әхлаклылык, шәфкатьлелек орлыклары сала. Яхшылык һәм явызлык, тәрбиялелек, өлкәннәргә карата хөрмәт, кечкенәләргә шәфкатьле булу, гаиләңне ярату,  рухи һәм әхлакый кыйммәтләр турындагы төшенчәләрне балаларга аңлаешлы һәм гади итеп аңлатып бирә.

Ул балаларның эчке дөньясын тоемлап, аларны аңлап-сизеп, үз күңеле аша үткәреп яза шигырьләрен. Аның нәни геройлары тапкыр да, шаян да, шул ук вакытта моңсу да.

Кичә ахырында Йолдыз апа балаларга истәлек итеп үзенең китапларын  һәм Сабантуй журналын бүләк итте. Бу күңелле очрашу истә калырлык булды. Йолдыз Шәрәповага сәламәтлек, уңышлар, иҗатының гөрләп чәчәк атуын телибез, берсеннән-берсе матур эчтәлекле китаплар, яңа очрашулар көтеп калабыз.

Шушы матур очрашу кичәсен оештырган китапханәче Фәнүзә Мансур кызына зур рәхмәт.

Туембаш авылы балалар бакчасы тәрбиячесе Гиниятуллина Эльмира.