Язучы да Алиш, батыр да
Кыска гына гомерендә кызыклы һәм матур әкиятләр, хикәяләр һәм шигырьләр иҗат иткән татар язучысы Абдулла Алишның тууына 110 ел тулу уңаеннан Яңа Бүләк авылы китапханәсендә “Тылсымлы китаплар язучы” дип исемләнгән әдәби кичә узды.
"Язучы да Алиш, батыр да" дип аталган китаплар күргәзмәсендә Алишның төрле елларда басылган әсәрләре һәм китаплары, аның турында булган газета һәм журналлардагы мәкаләләр тупланган иде.
Кичә Алиш әкиятләреннән өзекләр укып, аларның нинди әсәрдән булуын танып белү белән башланып китте. Кичәне алып баручы югары сыйныф укучылары Идрисова Динара белән Якупова Айгөл язучының иҗатына, тормыш юлына бай эчтәлекле күзәтү ясадылар. Аларның чыгышы презентация, фотосурәтләр белән үрелеп барды. Балалар Абдулла Алиш әсәрләре буенча төзелгән әдәби викторина сорауларына дөрес һәм төгәл итеп җавап бирделәр. Килгән кунаклар "Сәйлән" балалар бакчасына йөрүче нәниләрнең "Чукмар белән Тукмар" һәм мәктәп укучылары әзерләгән "Куян кызы" әкиятләрен яратып кабул иттеләр. Чара Теләнче Тамак авылы китапханәсе хезмәткәрләре күчтәнәчкә алып килгән курчак театры белән тәмамланды.
Әлеге кичә Абдулла Алишның батыр, Ватанга тугрыклы булуы белән халык күңеленә кереп калган шәхес икәнлеген тагын бер кат дәлилләде. Балаларга аның иҗаты якын һәм кызыклы. Абдулла Алишның әсәрләре һәрвакыт тәрбияви чыганак булып тора.
Китапханә мөдире Зөлфия Мингалиева.
Следите за самым важным и интересным в Telegram-каналеТатмедиа
Безнең телеграм каналга язылыгыз «Көмеш кыңгырау»
Нет комментариев