Тиңсез хәзинә

Халык шагыйре Шәүкәт Галиев китапны хәзинә белән тиңләп, аңа югары бәя бирә. Иң мөһиме – ул хәзинәне үзең белән теләгән кадәр алып була. Белемле меңне егар, көчле берне егар, ди халык мәкале. Ә белемне без китаптан алабыз. Балаларны китап белән таныштыруны бик кечкенәдән башларга икәнен һәрберебез яхшы белә.

Чаллының 17/15 йортында урнашкан үзәк балалар китапханәсенә дә балаларын җитәкләгән әти-әниләр еш килә. Бер яше дә тулмаган кечкенә сабыйларын да алып киләләр безгә, алар безнең күз алдында акыллы һәм белемле балалар булып үсә.  Кечкенәдән үк китап укыган бала мәктәпкә баргач башкалардан бер башка өстен тора. Китапханәбез елдан-ел берсеннән-берсе бай эчтәлекле, кызыклы, матур рәсемле китаплар белән тулылана бара. Әти-әниләргә ике телдә булган (татарча-русча текстлы) китаплар бик ошый. Мондый китаплар туган телебезне камил белергә өйрәтә. Берничәсен сезнең игътибарга да тәкъдим итәсем килә: «Туган як әкиятләре», «Мырау батыр», «Әтәчкәй – алтын кикриккәй», «Урман әкиятләре», «Мин әкият яратам», А.Алиш «Әкиятләр илендә», Г.Тукай «Кырлай әкиятләре», Ә.Сафиуллин «Актәпи һәм Сорыкай турында», Л.Толстой «Слива төше», А.Пушкин «Әкиятләр» һ.б. Чаллы шәһәре язучылары иҗат иткән «Садик» сериясе китаплары да мәктәпкәчә яшьтәге балаларның рухи үсешенә уңай тәэсир ясый.

Хөрмәтле әти-әниләр, кадерле балалар! Сезне китапханәбездә көтеп калабыз!

     Лилия Хәкимуллина, Чаллы шәһәре, Үзәк балалар китапханәсе хезмәткәре