Әниемнең җылы кочагы

Көннәр якты булсын өчен,

Бәхет-шатлык артсын өчен,

Әни кирәк, әни кирәк.

Иң кадерле кеше җирдә -

ӘНИ, димәк!

Р.Миңнуллин.

Сине яклаучы, авыр чакта юатучы, синең уңышларыңа чын куңелдән сөенүче кеше ул – Әни!

Һәр елны ноябрь ае ахырында Әниләр көне билгеләп үтелә. Шул уңайдан безнең 108нче “Бәхетле балачак” балалар бакчасында да әниләргә багышланган җылы кичә үткәрелде. Кичә бәйрәмчә бизәлгән залда тәрбияченең әниләргә багышланган җылы сүзләреннән башланды. Балалар да әниләренә карата булган җылы хисләрен, чын йөрәктән чыккан ярату сүзләрен шигырьләр, матур җырлар аша җиткерергә ашыкты. Балалар үзләрен нәни артистлар ролендә сынап карадылар, дулкынландылар, дәррәү кул чаптылар.

Кичәбезгә балалар ясаган рәсемнәр күргәзмәсе аерым ямь өстәп торды. Нәниләребез һәрберсе әниләренең сурәтен тырышып рәсемгә төшереп килгән иде. Һәрбер бала әнисе турында, аның күркәм сыйфатлары хакында бик җылы итеп сөйләде. Кичә ахырында тәрбияче апалары әниләргә карата хөрмәт, мәрхәмәтлелек, әниләребезгә ярдәм итү кирәклеге турында әңгәмә үткәрде. Әниләребезне саклыйк, аларның йөзләреннән беркайчан да елмаю китмәсен дигән теләктә калыйк!

108нче “Бәхетле балачак” балалар бакчасының ана теле тәрбиячесе Капитонова Ирина Петровна, төркем

тәрбиячесе Шәйхетдинова Чулпан Миндилевна.