Мәктәбебездә – ТНВ кунаклары

Бөек Тукаебыз туган көнне билгеләп үткән язгы матур апрель аенда әдәбият көннәре уңаеннан безнең мәктәпкә мәртәбәле кунаклар кайтты. Авылдашыбыз, күренекле шагыйрә Әлфия апа Ситдикова иҗаты буенча телевизион тапшыру төшерү өчен ТНВ каналыннан иде алар. Кунаклар кайтасын бераз алданрак белү файдага булды, әлбәттә. Тарих укытучыбыз Лилия апа тарафыннан мәктәбебез музеендагы стендлар бик матур итеп яңартылды. Экспонатларны яңартуда, урнаштыруда укытучыбыз Әнисә апа бик тә булышты. Китапханә бик матур үзгәрешләр кичерде, Нәзлия апа аны зур осталык белән яңартты. Без, укучылар исә, кулыбыздан килгәнчә булыштык.

Әлфия апа безне хөрмәт итеп, безгә ышанып кайтачагын белеп, матур итеп шигырьләрен ятладык, аның китапларын тагын бер кат барлап, күргәзмә әзерләдек. Аның сүзләренә язылган җырларны өйрәндек. Кызлар вокаль ансамбле тарафыннан башкарылган “Кайтам сиңа, Актаныш” җыры белән кунакларны каршы алдык. Безнең белән кулга-кул тотынып эшләүче җирлек башлыгы Илдар абый  Мусин, авылыбыз китапханәчесе Ләйсән апа Акмалова, мәдәният хезмәткәре, баянчы Фәнәвис абый Ахунов та әлеге чарада кайнадылар. Балалар бакчасы да бу эшләрдән читтә калмады. Нәниләребез очрашуны бигрәк тә көтеп алдылар.

ТНВ каналы хезмәткәрләре режиссер Зөлфирә апа Мөхәммәдиева, мөхәррир Миләүшә апа Гарипова, оператор Александр Вольнов абыйларның һөнәри осталыкларын үз күзләребез белән күрдек, алар белән аралаштык. Тапшыруны карап утырганда гына җиңел булуын, аны әзерләп эфирга чыгарганчы җиде кат тир түгелүен аңладык. Кунакларыбыз ачык күңелле, аралашучан, гади булулары белән күңелдә калды. Тапшыруның бөтен серен ачып бетермибез, тиздән ул тулысынча эшләнеп бетеп, ТНВ каналыннан күрсәтеләчәк.

Әлфия апага  без һәрчак рәхмәтле. Ул безне үз итеп, якын итеп һәрчак  кайтып йөри. Бик матур әлеге очрашуда да туган авылы, туган мәктәбенең илһам чыганагы булуына басым ясады. Шигъриятле, Тукайлы атнабыз менә шундый зур эчтәлекле матур чарадан башланды. Ул дәвамлы булыр.

Зәринә Газетдинова, Актаныш районы Күҗәкә төп гомуми белем бирү мәктәбенең 7нче сыйныф укучысы.