Безнең кадерлеләребез

Без аларны өлкән булган өчен генә түгел, ә әти-әниләребез, әби-бабайларыбыз булган өчен дә хөрмәт итәргә тиешбез.

Безнең Котлы-Бүкәш “Дуслык” балалар бакчасында бу юнәлеш буенча күп эш алып барыла. Бакчабызда эшләп лаеклы ялга чыккан өлкәннәрне өйләренә барып котлау, аларны бакчабызга чәй табыны артына чакыру инде матур традициягә әйләнде.

Быел да һәр ветеранның өенә чәчәкләр, котлау открыткалары илттек.

Ә 1 октябрь көнне өлкәннәребезне бакчабызга дәштек. Алар чәй табыны артында, бер-берсе белән гәпләшә-гәпләшә, балалар һәм тәрбиячеләр көче белән әзерләнгән концерт номерлары карадылар, үзләре бакчада эшләгән чорның вакыйгаларын яңарттылар.

Өлкәннәр әлеге чараны оештырган өчен зур рәхмәт әйттеләр.

Алар бәйрәмнән бик канәгать булып, җылы хисләр, матур тәэсирләр белән таралыштылар. Балаларга тәртипле, тәүфикълы булырга, ә тәрбиячеләргә армый-талмый, барлык авырлыкларны җиңеп гел алга барырга, яңа үрләр яуларга насыйп булсын дигән теләкләрен белдерделәр.

Котлы-Бүкәш “Дуслык” балалар бакчасы тәрбиячесе Лилия Шагиева.