Абыем солдаттан кайтты

Абыем Сабиров Рафаэль Россия Армиясе сафларында ракета гаскәрләрендә укчы (стрелок) булып хезмәт итте. Ул Саратов өлкәсенең Светлый поселогында хәрби бурычын намус белән үтәп, туган җиребезгә – Теләкәйгә кайтты.

Абый армиягә үзе теләп китте. Хезмәте турында бер сүз сөйләтеп булмый. “Барсы да әйбәт”, - дип кенә куя. Абый хезмәт иткән хәрби часть командирыннан грамота белән бүләкләнде.

Генерал-майор М.В. Баитов язган хатта: “Сезнең улыгыз ракета гаскәрләрендә бурычын намуслы үти. Сез илебезнең чын сакчысын үстергәнсез, улыгыз белән горурлана аласыз. Улыгызны яхшы тәрбияләгәнегез өчен сезгә рәхмәт җиткерәбез”, - диелгән. Абыем үзенең грамотасын безгә почта аша җибәрде. Аның турындагы шушы хәбәргә мин сөендем, әти-әниемнең дә күңеле шатлык хисләре белән тулды.

Мин абыем белән бик горурланам. Аның кебек кыю, көчле һәм курку белмәс кеше буласым килә.

19 нчы ноябрь – ракета көне буларак билгеләп үтелә. Рафаэль абыемны әлеге бәйрәм белән котлыйм һәм ныклы сәламәтлек, күңел күтәренкелеге, шатлык-куанычларга күмелеп яшәвен телим!

Актаныш районы Теләкәй мәктәбенең 3 нче класс укучысы Сабирова Гөлмирә.