Яңа уку елында мәктәпләрдә дәрескә чакырып кыңгырау чылтырамаячак

Бу тәнәфес вакытында балалар азрак аралашсын өчен шулай эшләнә. Шулай ук, мәктәптә ашау вакыты да һәр сыйныфныкы аерым булыр дип планлаштырыла.

Татарстан республикасының Мәгариф һәм фән министры урынбасары Алсу Әсәдуллина белдергәнчә, балаларның кабинеттан кабинетка күчмичә үз сыйныф бүлмәләрендә генә укуын тәэмин итү кирәк. 

Татарстанда 1 сентябрьдә урамда уза торган линейкаларда 100 кеше катнаша алачак, бинада — 50 кеше. 

«1 сентябрьдә линейкаларны безгә тыймыйлар, бездә булачак, әмма кагыйдәләрне төгәл үтәргә кирәк. Урамда линейкада катнашучылар йөздән, ә бинада илледән артмаска тиеш», — дип аңлатты Алсу Әсәдуллина.

Мәктәпләрдә башка күмәк чаралар кичектереләчәк.

«Мәктәпләрдә чаралар булачак, әмма алар параллель сыйныфлар белән бергә яки аерым сыйныфларда булачак. Бу мәктәптәге балалар санына бәйле», — диде Алсу Әсәдуллина.

Ата-аналарга мәктәпкә битлек киеп килергә кирәк булачак, дип искәртте ул.