Чаллыда яшь инспекторлар өчен “Имин тәгәрмәч” республика конкурсы башланды

Республика ярышларында конкурсның район һәм шәһәр этапларында җиңгән 9-11 яшьтәге 228 укучы катнаша.

“Бүген республикада яшь инспекторларның 1400 отряды эшли. Аларда 18 мең бала шөгыльләнә. Мин барлык катнашучыларга да уңышлар һәм имин юллар телим”, - диде ачылу тантанасында Татарстанның баш автоинспекторы Ленар Габдрахманов.

Шәхси һәм команда зачетында юл хәрәкәте кагыйдәләрен, беренче ярдәм күрсәтүне һәм реаль юл шартларында велосипед белән идарә итүне иң яхшы белгәннәр ачыкланачак. Командалар составында конкурсантлар юлдагы тәртип кагыйдәләре буенча теоретик имтихан тапшырачак. Шулай ук иҗади конкурста катнашып жюрига агитацион чыгышлар тәкъдим итәчәкләр.

Чараны оештыручылар яшь инспекторлар отряды эшчәнлегенә җәлеп итеп, яшь җәяүлеләргә һәм велосипедчыларга юлларда имин хәрәкәт турында искәртү бурычын куя.

Бу хакта тулырак: https://tatar-inform.tatar/news/2019/09/04/192805/