Чаллы театрында Тыпырдык белән Зәйнәп маҗаралары

Могҗизаларга да ышана башлыйсың. Чаллы татар драма театры куйган «Тыпырдык» спектаклен карагач, бигрәк тә.

...Беркөнне авылга кунакка кайткан Зәйнәп күбәләк тотам дип урманга керә дә адаша.

Урманда ялгызың калсаң, бик куркыныч ул. Ярый әле аңа куян малае Тыпырдык очрый. Тыпырдык үзе дә авылга илтә торган юлны белми икән.

Бергәләшеп шуны эзләгәндә Зәйнәп белән Тыпырдык бик күп нәрсәгә өйрәнәләр. Менә, мәсәлән, яфракларына карап агачларны танырга, йолдызларга карап юлны табарга... Хәер, бөтенесен дә сөйләп бетермик әле, үзегез барып карагач, белерсез. Тыпырдык, Кыбырсык, Мыгырдык, Ябалак һәм Зәйнәп белән уйнап, җырлап-биеп тә алырсыз. Кыскасы, килегез, кызык булачак!