Һәр бала сәләтле!

Психологлар раславынча, 6-7 яшьләрендәге теләсә кайсы бала сәләтле була ала. Әгәр дә беренче сыйныфта ук яхшы билгеләргә генә укымый икән, димәк, аны психологка күрсәтергә кирәк, диләр. Мөгаен, аның сәләте  ачылмаган гынадыр?

Тарихта начар укыган даһилар турында мәгълүматлар  шактый күп.

4 яшьлек Капабланка (1888-1942), шахмат уйнап утырган әтисе оттыра башлагач, ничек йөрергә кирәген әйтә һәм әтисе ота. Бу хәлгә өлкәннәр шаккаталар. Капабланка шахмат буенча дөнья чемпионы була.

 «Гулливер маҗаралары»ның авторы Джонатан Свифт (1667-1754) математиканы сөймәгән, бу фәннән алган бөтен билгесе икеле булган.

Д.И.Менделеев (1834-1907) медицина-хирургия академиясенә имтихан тотканда химиядән икеле алган һәм педагогия институтына керергә мәҗбүр булган.

Исаак Ньютон мәктәптә бик начар укыган, үпкәчел, елак булганга, аны башкалар мокытка санаган.