Татарстанда «Умницы и умники» VI Республика уены үтте

Уен «Дуслык» сәламәтләндерү-белем бирү комплексында үтте.

Уенны оештыручылар:
- Татарстан Республикасы Мәгариф һәм фән министрлыгы;
- ТР Мәгариф һәм фән министрлыгының Республика олимпиада үзәге;
- ТР Фәннәр академиясенең Ш. Мәрҗани исемендәге Тарих институты.

Уен ике этапта үткәрелде:
сайлап алу этабы – 17 майдан 27 майга кадәр;
финал – 10 июньдә.

Сайлап алу этабының йомгаклау раунды 27 майда Республика олимпиада үзәге базасында «Идел буе Болгарстанында Ислам динен кабул итүгә 1100 ел» темасына интеллектуаль олимпиада форматында узды.

Анда Татарстанның 14 районыннан (Әгерҗе, Азнакай, Актаныш, Бөгелмә, Югары Ослан, Алабуга, Яшел Үзән, Кукмара, Түбән Кама, Норлат, Спас, Тәтеш, Теләче, Чистай), шулай ук, Казаннан һәм Чаллыдан 45 укучы катнашты.

Йомгаклау раунды өч турда узды:
- «Яшь туган якны өйрәнүче», анда балалар үзләренең туган якны өйрәнү буенча белемнәрен күрсәттеләр;

- «Рус сүзен белүчеләр», анда балалар рус теленең фонетикасы, орфографиясе һәм морфологиясе буенча үзләренең белемнәрен күрсәттеләр;

- «Ораторлык сәнгате», анда балалар үз фикерләрен дөрес һәм ышанычлы итеп җиткерә белергә тиеш иделәр.

Уенның финалы югарыда күрсәтелгән темаларга «Умницы и умники» интеллектуаль олимпиадасы форматында узды.
Анда Әгерҗе, Актаныш, Югары Ослан, Алабуга, Яшел Үзән, Кукмара, Спас, Тәтеш, Теләче районнарыннан һәм Казаннан 30 бала катнашты.

Жюри составында ТР Фәннәр Академиясенең Шиһабетдин Мәрҗани исемендәге Тарих институтының профессор-укытучылар составы хезмәткәрләре, аның Рәисе, фәнни эш буенча директор урынбасары, педагогика фәннәре кандидаты Марат Гыйбатдинов бар иде.

Уен шартлары буенча бирелгән сорауга тулы җавап биргән теоретикларга һәм агонистларга «Умницы и умники» ордены тапшырылды. Җавап тулы булмаган очракта медаль бирелде.

Иң күп орденны (6 орден) Яшел Үзән районы 3нче гимназиясенең 10нчы сыйныф укучысы Андрей Цапок җыйды. Аңа «Умницы и умники» уенында җиңүе өчен I дәрәҗә диплом тапшырылды.

«Умницы и умники» уены призеры исеменә һәм II дәрәҗә дипломга Казан шәһәре Вахитов районының инглиз телен тирәнтен өйрәтүче 39 нчы урта гомуми белем бирү мәктәбенең 10 нчы сыйныф укучысы Илья Белов лаек булды.

Шулай ук «Умницы и умники» уены призеры исеменә һәм III дәрәҗә дипломга Актаныш районы «Аерым фәннәрне тирәнтен өйрәнүче Актаныш урта гомуми белем бирү мәктәбе»нең 8нче сыйныф укучысы Илнур Әмирханов лаек булды.

Түбән Кама районы 35 нче лицееның 10 нчы сыйныф укучысы Камил Мөгиновка һәм Чистай районы 1 нче гимназиясенең 10 нчы сыйныф укучысы Марина Атуровага IV дәрәҗә дипломнар тапшырылды.

Уенда катнашучыларга тәкъдим ителгән сораулар шактый катлаулы һәм үзенчәлекле иде, алар Идел буе Болгары чорыннан алып бөтен Татарстан тарихын яхшы белүне күз алдында тота.

Уен югары оештыру дәрәҗәсендә узды, аны Казан шәһәре Яңа Савин районының «Аерым фәннәрне тирәнтен өйрәтүче 85 нче урта гомуми белем бирү мәктәбе» директоры Ренат Хәйруллин алып барды.

Катнашучылар һәм команда җитәкчеләре киләсе 2023 елда да уенда катнашырга теләк белдерделәр.