Мондый хәлләргә юлыгырга язмасын. Ә була калса, нишләргә?

Һәлакәткә бер адым

Тимер юл – югары куркыныч зонасы. Поездны тиз генә туктатып булмый! 60-70 км/сәг тизлек белән хәрәкәт итүче поездны туктату өчен 600-700 метр кирәк, ди белгечләр. Тимер юл транспорты һәлакәте вакытында үзеңне ничек тотарга? Иң беренче чиратта нәрсә эшләргә?

*Тәрәзә һәм ишекләр яныннан читкә китегез.

*Егылмас-бәрелмәс өчен, ныгытып тотыныгыз. Иң яхшысы – вагон идәненә төшеп утырыгыз. Аркагызны стенага терәп, аякларыгыз белән нәрсәгә дә булса таяныгыз.

*Поезд туктап беткәч, тәрәзәләр яки ишек аша вагоннан тизрәк чыгып китәргә тырышыгыз. Авариядән соң, янгын чыгу ихтималы бик зур. Авыз-борын капларга юеш чүпрәк-чапрак алырга өлгерсәгез, бик яхшы. Чемоданнар турында, гомумән, уйламагыз. Документ, акча алсагыз, шул җитә.

*Адым көчәнеше астына эләкмәс өчен (электропоезд һәлакәткә очраганда һәм контакт чыбыгы өзелгәндә), тимер юлдан кимендә 30 метр читкә китегез.

*Булдыра алганча, зыян күрүчеләргә беренче медицина ярдәме күрсәтегез.

*Иң мөһиме – үзегезне кулга алыгыз, паника тудырмагыз, башкаларны да тынычландырырга тырышыгыз, дуслар.

Юлларыбыз хәерле, сәяхәтләребез имин булсын берүк!