Кукмара районы «Каенкай» балалар бакчасының «Кукморенок» командасы (мәктәпкә әзерлек төркемендә тәрбияләнүчеләр, аларның әти-әниләре һәм тренер (тәрбияче)), Мәскәүдә узган «Россиянең инженер кадрлары» Бөтенроссия ярышының финалында катнашты. Чара ВДНХ Ромостанциясендә узды. «ИКаРёнок – 2022» ярышларына илебезнең төрле төбәкләреннән 35 команда килде. 

Ярышның беренче этабында кукмаралылар үзләренең белемнәрен һәм мөмкинлекләрен күрсәттеләр. Яшь инженерлар легомашиналар узышында көч сынашты, һәм команда белән Голдберг машинасын төзеделәр.

Ярышның беренче этабы тәмамланганнан соң балалар һәм педагог-тренерлар өчен робот техникасын кулланып лего-конструктор төзү буенча мастер-класслар күрсәтелде.

Ярышның икенче этабында балалар үзләренең «Киләчәк Экоэкспресс поезды» иҗади проектын якладылар, судьяларның сорауларына җавап бирделәр.

Ярыш нәтиҗәләре буенча «Каенкай» балалар бакчасының «Кукморенок» командасы «Белемгә омтылыш» номинациясендә Кубок һәм диплом белән бүләкләнде.

Чыганак: https://mon.tatarstan.ru/tat/index.htm/news/2095695.htm