Казанда «Мин — Татарстан» ярминкәсе оештырыла

Казанның Бауман урамында үзмәшгульләр продукциясе ярминкәсе 29-31 августта узачак. Татарстанлылар 120 сәүдә урынында һөнәрчелек продуктлары, бизәнү әйберләре, кием-салым, тәм-томнар, истәлекле бүләкләр һәм башка, шул исәптән милли тематикалы товарлар күрсәтә алачак. Бу хакта Казан Мэриясе телеграм-каналы хәбәр итә.

Ярминкәдә республика территориясендә эшчәнлек алып баручы һөнәри керемгә салым түләүчеләр бушлай катнаша ала. Моның өчен цифрлы платформада гариза бирергә кирәк.

«Татар халкы сәүдәгәрлек белән дан казанган. Бу традицияне саклап һәм үстереп, Бауман урамына рәхим итегез!» диелә хәбәрдә.

Фото: © Абдул Фархан / «Татар-информ»