Чаллыда Факил Сафин иҗатына багышланган фәнни-гамәли конференциянең йомгаклау чарасы үтте

22 апрель көнне Чаллы шәһәренең 55 нче гомуми белем бирү мәктәбендә Татарстан Язучылар берлеге рәисе урынбасары, Чаллы бүлеге җитәкчесе, күренекле әдип, филология фәннәре кандидаты, Гаяз Исхакый, Абдулла Алиш, Габдулла Тукай исемендәге премияләр иясе Факил Сафин иҗатына багышланган фәнни-гамәли конференциянең йомгаклау чарасы үтте.

Әлеге чарада укытучылар, укучылар, “Шәһри Чаллы” газетасының баш мөхәррире Резеда Юсупова, “Көмеш кыңгырау” газетасының баш мөхәррире Резеда Гасыймова, филология фәннәре кандидаты Лилия Хөснетдинова, филология фәннәре кандидаты, җырчы Дания Сибгатуллина-Нигъмәтҗанова, шагыйрә Әлфия Ситдыйкова катнаштылар. Кичә дә укучылар әдипнең шигырьләрен сәнгатьле итеп сөйләделәр. Факил Сафин сәхнәдә чыгыш ясаган балаларга Татар телен үстерү комиссиясе җитәкчесе Марат Әхмәтов ярдәме белән басылып чыккан китапларын бүләк итеп бирде. Дания Сибгатуллина Факил Сафин иҗат иткән җырларны башкарды. Тел һәм милләт, тәрбия һәм матбугат хакында гамьле сөйләшү белән тәмамланды.

Чыганак https://vk.com/yazuchilar?w=wall-61004358_6500