Көмеш кыңгырау

ҖӘЙ ҮТЕП БАРА СЫМАН...

Ленар Шәех.

Кояш та иренеп карый

Болытлар арасыннан.

Ак толыпларга ияреп,

Җәй үтеп бара сыман.


Каен сары яфракларын

Бирә җилләр иркенә.

Җәйге көннәр, җәйге көннәр

Яфрак булып җилпенә.


Каз-үрдәк тә, моңаешып,

Канатын кага сыман.

Җәйнең күз яшьләре булып,

Күктән моң ага сыман.


Адашып китәрсең кебек

Төннәрнең карасыннан.

Төнге суыкка ияреп,

Җәй үтеп бара сыман.

Теги: Шигырь
Нравится
Поделиться:
Реклама
Комментарии (0)
Осталось символов: