Көмеш кыңгырау

Республика балалар һәм яшүсмерләр газетасы

18+
2024 - Гаилә елы
Шигърият

Туган ягым – тургайлы як

Мансур Сафин шигырьләре.

ТУГАН  ЯГЫМ

 

                           Туган ягым – тургайлы як:

                           Күңелемдә яши җыры!

                           Миңа дигән

                                                сөенечләрнең

                           Монда яши иң зуры.

 

                          Туган ягым – аккошлы як:

                          Таңнар яктысы  изге!

                          Тылсымлы

                                              вә могҗизалы

                          Мондагы  һәрбер мизгел.

 

                          Йөрәкләрне җилкендереп,

                          Чык чыңлый

                                                   чалгыларда.

                          Әткәм-әнкәмле  туган як –

                          Ал терәк кайгыларда!

 

                            ТАҢ  ЧЫПЧЫГЫ

 

                         Янә иртә таңнан торып,

                         Болынга оча чыпчык:

                         Анда эзләп таба икән

                         Ул шифалы, серле чык.

 

                         Серле чыкны эчеп туйгач,

                         Кайта өенә чыпчык:

                         Шуннан аның сайраулары

                         Үзенә күрә  бер җырчык!

 

                         Болынның өр-яңа серен

                         Беләсең килсә -

                                                      чыпчык

                         Сөйләр аны сиңа, дустым:

                         Тизрәк тор, каршына чык!

 

                              АВЫЛДА

 

                     Иреккә чумам авылда!

                     Таңнар ишек алдыннан

                     Йөгерәләр урман-кырга:

                     Анда минем  адымнар.

 

                     Офык, киң колач җәеп,

                     Хәерле иртә тели –

                     Әллә нинди бәхет хисе

                     Күңелләремне били!

 

                               КҮБӘЛӘК

 

                      Бакча буйлап,

                                             түбәләп

                      Очып йөри  күбәләк –

                      И, җиңел дә соң бүген

                      Айкый дус авыл күген!

 

                      Аңа – белә микән ул? –

                      Бер көнлек кенә бу юл...

 

                                   ЯҢГЫР

 

                     Яңгыравыклы зәңгәр яңгыр!

                     Яшенле яшел яңгыр!

                     Алар шундый  сөенчелләр –

                     Гүя  балачак  чагым.

 

                    Малай – шалайлар артыннан

                    Иярде йөгерек яңгыр:

                    Әллә безнең урамда ул

                    Эзлиме җәннәт  ягын?!

 

Следите за самым важным и интересным в Telegram-каналеТатмедиа

Безнең телеграм каналга язылыгыз «Көмеш кыңгырау»


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев