Курыкмыйбыз

Курыкмыйбыз

Шуабыз иң биек таудан,

Юк, шумыйбыз - очабызф!

Очкан чакта ак карларны,

Ак җилләрне кочабыз!

Без шуганда, бөтерелеп,

Бураннар чыгып кала.

Кайберебез ярты юлда

Көрткә дә чумып кала!

Тауга менгәндә дә менә

Шуып менәсе иде,

Шуып менүнең хикмәтен,

Серен беләсе иде.

Җиңел түгел бит менүе

Шундый текә түбәгә,

Баш әйләнә башлый хәтта,

Карап торсаң түбәнгә.

Төшүе дә җиңел түгел,

Ә шулай да шуабыз.

Куркуны без үзебездән

Еракка ук куабыз!

Таудан төшкәндә ул үзе

Чанадан төшеп кала.

Бик биек шул!

Мондый таудан

Курыкмый төшеп кара!