Көмеш кыңгырау

Бер уйдан да мең уй туа кайчак...

***

Бер уйдан да мең уй туа кайчак,
Сорау туа чиксезлеккә тиң.
Дистә гасыр эзләнгән җавапка
Төшенерсең кебек бары син.

Чылбыр гына түгел, әйләнәгә
Әверелә уйлар ташкыны.
Һәм җавапсыз калган сорауларның
Өшеттерә җиле, салкыны.

Бер нокта да сорау билгесе күк,
Мәгънәдәшлек эзли бушлыктан.
Тик кызганыч, сорау белән җавап -
Икесе дә ике тарафтан!

Санны санга кушкандагы уйны
Мин санамас идем уйга да.
"С"ны "Җ"га әйләндереп була,
Тик хакыйкать түгел тамгада.

Адилә Әхмәтҗанова.

Нравится
Поделиться:
Реклама
Комментарии (0)
Осталось символов: