«Көмеш кыңгырау»га Чаллыдагы 42нче мәктәп укучылары экскурсиягә килде

Редакциябезгә балалар килсә, бигрәкләр дә күңелле була инде. Бу юлы «Көмеш кыңгырау»га Чаллыдагы 42нче мәктәп укучылары экскурсиягә килделәр. Аларның газетаны ничек ясаганнарын беләселәре килгән. Без аларга газетаның ничек эшләнгәнен, каян материаллар җыйганыбыз турында сөйләдек. Балалар газетадагы куар кодларага да игътибар итеп баралар икән. Һәрберсе телефонын теләгән куар кодка якынайтып, видео карады. Ралина, Самира, Әмин, Ренат – барысы да бик кызыксынучан булып чыктылар. Сорау артыннан сорау яудырдылар. Аларга иң ошаганы – верстка бүлеге булды. Компьютерда газетаның ничек җыелуын, бизәлешен күзәтеп тордылар. Аннары без «Көмеш кыңгырау»ны типографиягә җибәрдек. Балалар аның хәзер почтадан килгәнен көтәләр. Ахырдан без укучыларга истәлекле бүләкләр тапшырыдык. Киләчәктә алар да хатлар язарлар әле, безнең авторларыбыз булып китәрләр.