Мәрьям Сабирова: «Әти + мин = яңа бию!»

Сезнең социаль челтәрләрдә Мәрьям һәм Данир Сабировларның парлы биюләрен күргәнегез бармы? Шәп бииләр бит! Инде меңнәрчә карау җыйган бу видеолар. Иң кызыгы — темалары да, стильләре дә төрле! Бер видеоязмада — милли костюмнардан, ягъни татарча. Икенчесендә — бөтенләй заманча. Һәм бу кызыклы биючеләрне әтиле-кызлы дип, күпләр, бәлки, уйламыйдыр да!

Икесе дә танылган кешеләр алар, дөресен әйткәндә. Данир Сабиров — татар эстрадасының иң популяр артистларыннан берсе, Мәрьям Сабирова — «Лучше всех» тапшыруы аша бөтен ил күргән гимнастка. Бүгенге әңгәмәдәшебез, әлбәттә, Мәрьям. 

— Мәрьям, без әтиең белән биегән видеоязмаларыңны көтеп алабыз. Бергә бию кемнең идеясе иде? 
— Белмим дә инде. Гаилә белән сөйләшеп утырганда үзеннән-үзе туды бугай. Аннары инде үзебезгә дә кызык булып китте.
— Бер биюне озак әзерлисезме?
— Кайчан ничек инде. Кайберсен өйрәнергә бер-ике репетиция дә җитә, аннары чистарту (кирәкмәгән элементларны төшереп калдыру) өстендә эшлибез. Кайберсе озаккарак сузыла. Заманча бию өйрәнү җиңелрәк минем өчен. 
— Ә ни өчен нәкъ менә әтиең белән? Яшьтәшләрең арасында да бардыр бит бию буенча партнерларың?
— Юк. Мин бит биюгә йөрмәдем. Кечкенәдән гимнастика белән шөгыльләнәм. Ә бию ул... шуңа өстәмә кебек. Биергә яратам, миңа бию сәләте бирелгән ул. 
— Ә әтиеңнән тыш парлы бию башкарасың килгән кеше бармы?
— Юк. Йә әти белән, йә үзем генә биергә уйлыйм.
— Гимнастиканы да дәвам итәсеңме соң?
— Әлбәттә. Мәктәптән тыш, көн саен гимнастикага йөрим. Быелдан әле вокалга да йөрисем килә. Модельләр мәктәбенә, инглиз теленә дә язылдык. Ай Алла, барысына да ничек йөреп бетәрсең инде син, ди әни. 
— Әйдә, уңышларыңны барлыйк әле. 
— Гимнастика буенча күп кенә республикакүләм бәйгеләрдә җиңгәнем бар. «Мини мисс Казань» бәйгесендә җиңү яулаганым бар, "Мини Мисс Кремлевская Набережная"да тамашачы мәхәббәте номинациясендә җиңдем. 
— Бүгенге көндә нинди уй-хыялларың бар?
— Татарча җыр яздырасым килә. Дөрес, мин берничә телдә җырлаячакмын. Татарчадан башлыйм.
— Татарча әйбәт беләсеңме?
— Беләм, чөнки безнең өйдә бу һәрчак контрольдә бит. 
Әңгәмәне Ризидә Рәхмәтуллина әзерләде.