Маҗаралы алмагач

МАҖАРАЛЫ АЛМАГАЧ

Агачта йөз алма үскән.
Шуларның дүрттән бере
Пешеп җитеп, 
өзелеп төшкән: 
Кып-кызыл, сусыл, эре.

Утыз алманы саескан
Агачта ук ашаган,
Унбишеннән
тиен-дускай
Кышка запас ясаган.

Бакчачы калган уңышын
Җыеп, кәрзингә салган:
Ул быел
алмагачыннан
Никадәр алма алган?

ИКЕ БҮЛӘК

Утыз кәнфит 
сатып алдым,
Биштән берен ашадым,
Калганының яртысыннан
Ике бүләк ясадым.

Берсен бирдем сеңлемә,
Икенчесен — энемә!

Хәзер үзең бел менә:
Ничәшәр кәнфит
салганмын
Һәр пакетның төбенә?

БАЛЫК ТОТТЫК

Сигез балык тотты Нәҗип,
Бишәрне Вил һәм Мөҗип.
Алтысы — һәйләкәр булып,
Китте кармакны өзеп.

Тоткан балыкның яртысын
Табада кыздырдык без:
Ничә балык ашалганны
Үзегез, чутлап, белегез!

ҮРДӘКЛӘР СЕРЕ

Җиде үрдәк йөзә иде,
Сунарчы төбәп атты:
Өч үрдәк
очып китсә дә,
Ничәсе китә алмады —
Ничәсе суга батты?..

ГӨМБӘ ҖЫЙДЫК

Туксан гөмбә җыйган идек.
Кортлы дүртен ташладык.
Егермесен, өйгә кайткач,
Кыздырып — вәт! — ашадык.

Калганын әнкәй, эшкәртеп,
Өч банкалык тозлады:
Чутла әле —
һәр банкага
Ничә гөмбә салган ул?