Ләкләк

admin, 24 октябрь 2024 - 13:44

113

Ләкләк — тавышсыз кош. Алар бер-берсе белән томшыкларын шыкырдатып «сөйләшәләр».

Ләкләк үзенең зур оясын авыл өе түбәсендә чыбык-чабык һәм ботаклардан ясый. Ләкләк оялаган йорт бәхетле нигез дип санала, шуңа күрә әлеге йортның хуҗасы аның тынычлыгын бозмаска тырыша.

Ләкләк — күчмә кош. Ул нигезен беркайчан да бутамый, яз саен шул оясына очып кайта. Елына 3–5 бәбкә чыгара. Бәбкәләр ата-аналары алып кайткан бака, тычкан, кәлтә яисә төрле бөҗәкләр белән туклана. Көзгә таба алар зур кош булып үсеп җитәләр һәм көньякка очып китәләр.

Бу кызык!
Ләкләк — тавышсыз кош. Алар бер-берсе белән томшыкларын шыкырдатып «сөйләшәләр».

Ак ләкләк – Беларуссия символларының берсе, ул тынычлык, татулык символы.
Бу кошлар ел саен үз ояларына кайтып утыралар. Ләкләкләрнең иң борынгы оясына 381 елдан артык.
Ләкләкләрнең оялары бик авыр һәм зур. Ләкләкләр белән бер үк вакытта аларда вак кошлар да яши, мәсәлән, чыпчыклар!
Ләкләкләр йомыркаларны чиратлашып баса: ана кош – төнлә, ата кош көндез.
Ләкләк балалары очарга ике айлык чагында өйрәнә башлый.
Ак ләкләк канатларының колачы ике метрга җитәргә мөмкин.
Ләкләк бер аягында басып йоклый, аякларын уянмыйча гына алыштыра.
Ләкләк бөҗәкләр, балык, бака, агулы еланнар белән туклана.
Кара ләкләк кешеләрдән ераграк, ә ак ләкләк, киресенчә, мөмкин кадәр якынрак яши.

Ләкләк
Ленар Шәех шигыре.
Очып килә ләкләк
Зәңгәр күктән... шәпләп:
"Бака, эләк-эләк —
Минем бөтен теләк"

Ә сазлыкта бака —
Бака-ка-ка-ка-ка
Бер түмгәктә ята,
Сазлыкны болгата:
"Мин иң көчле бака,
Бака-ка-ка-ка-ка!..."

Очып барган ләкләк
Килеп төшә шәпләп
Һәм баканы каба.
Оясына таба
Очып китә ләкләк,
Канат кагып... шәпләп.