Тыныш билгеләре

( , ) Өтер, өтер! Синсез тагын булмый,

Мәгънә бетә җөмләләрдә синсез.

Өзеп-өзеп сайрыйдыр кошлар да,

Өзеп сайрамаган кош күңелсез.

( ! ) Өндәү, өндәү! Синсез сүзләр көчсез,

Өндисең син җиңү, батырлыкка.

Сине күрсә күзләр, йөрәк кыса,

Дан җырлаучы тамга син халыкка!

( - ) Сызык, сызык! Игезәк сүзләр ясап,

Бермә-бер артадыр куәт синдә.

Башка тамга белән беррәттән син,

Ямь өстисең сүзләр тезмәсенә.

( ...) Күп нокталар... Алар күпне сөйли,

Дәвамлыдыр кеше күзаллавы...

Серле тамчы, уйланырлык тамга,

Томаланып китә күз аллары.

( ? ) Сорау, сорау! Җавап таләп итә,

Уйга чума күңел сорау күрсә.

-Кайсы тамга җитми, кайсы артык?

- Бар да кирәк сүзләр тезмәсенә.

Гади сүздән могҗизалар туа,

Тыныш билгеләре канат куйса!

Гасыр аша узар әйткән сүзең,

Туган телең Тукай теле булса.