Тычкан елында туганмын

Тычкан елында тугачтын,

Мин, мөгаен, тычкандыр,

Сиздермичә генә миңа

Берәр тычкан поскандыр...

Тычкан алмагач кимерә,

Ә мин алма кимерәм.

Яисә кишер кимерәм -

Шуңа бугай симерәм.

Тычкан чиный, малай чакта

Үзем дә чиный идем.

Тычкан төсле урлашуның

Мин кимен куймый идем.

Әнкәйнең шикәр-кәнфите

Савытта тормый иде.

Кәнфитләрне, миннән калса,

Тычкан да урлый иде.

Тычкан төсле тиктормас мин,

Тычкан төсле килбәтсез.

Тик мин татар тычканы бит,

Ә тычкан ул милләтсез.

Мин дәү тычкан, нәни булсам,

Йөрер идем ыштансыз.

Дөнья кызык булмас иде

Булган булса тычкансыз.

Ә мәчедән мин дә куркам:

Ул әллә нишләр кебек,

Мине тычкан дип белер дә

Килер дә тешләр кебек!

Йөрим мин дә тычкан төсле

Шыпырт кына, тын гына.

Коеп куйган тычкан бит мин,

Юк тик койрыгым гына.

Тычкан төсле шөкәтсез мин,

Тычкан төсле сөйкемле:

Минем хәтта мыегым да

Тычканныкы шикелле!