Ява да ява шушы кар...

Ява да ява шушы кар...

Ява да ява шушы кар...
Юрганың итеп ябын.
Искә төшереп ява ул
гомернең балачагын.

Ява да ява шушы кар...
Сагынсаң инде сагын:
хәтерләтә гомерләрнең
кызлар озаткан чагын.

Ява да ява шушы кар...
Уйлата уйның агын:
кулымнан тотып улымның
кар ерып үткән чагын.

Ява да ява шушы кар...
Нәрсә дип ява тагын?
Каршылагыз, ди, гомернең
моңлы-сагышлы чагын...

Ява да ява шушы кар...

Кадыйр Сибгатуллин.

Бу буран шулкадәр көтелгән!
Алҗытты дөньяның карасы...
Йөрәктән йөрәккә ераклык
Кайчакта бер буран арасы...
⠀
Бер гомер арасы ялгышлар -
Кул сузсам, җанымны пешерә.
Буранда - җәйләрдән җылырак
Бәгыре күшеккән кешегә...
⠀
Тыннарны куыра... Җилләрдән
Кайнарлык көттәмме мин юләр?
Тик кичә булган күк... буранлы
Кояшым син минем, диюләр...
⠀
Тик кичә булган күк... Ә бүген -
Түбәдән... һәммәсен көрт күмгән...
Жәлләмә адашты дисәләр -
Бу буран шулкадәр көтелгән!..

Гөлүсә Батталова