Үзебезнең Фәнис абый

Һәр авылның үз йолдызы, горурланырлык шәхесе бар. Туган авылым Курса Почмак та талантлы кешеләре белән дан тота. Араларыннан берсе – Татарстанның атказанган һәм халык артисты Фәнис Җиһанша белән Курса Почмак мәктәбендә очрашу кичәсе булды.
Авылдашыбыз, татар театры дөньясында үз урыны, үз йөзе булган, халык мәхәббәтен яулаган Фәнис абый Җиһанша үзенең балачагы турында сөйләде, мәктәп елларында булган истәлекләре белән уртаклашты. Шулай ук педагогия институтыннан Казан сәнгать һәм мәдәният институты студенты булып китүе турында да бик кызыклы итеп сөйләде. Һәркем аның сөйләмен кызыксынып, шаккатып тыңлап утырды. 

Фәнис Җиһанша укучыларны кызыксындырган сорауларга бик теләп җавап бирде. Үзенең яраткан шигырьләрен сөйләде, сәхнә серләре буенча мастер-класслар үткәрде: дөрес сулыш алырга, сәхнәдә үзеңне тотарга өйрәтте.

Чара концерт номерлары белән үрелеп барды. Укучылар үзләре әзерләгән спектакльләрдән өзекләр күрсәтте, җырлады, биеде. Кунагыбыз да горурланып, сокланып карап утырды. 

Бик эчтәлекле, кызыклы, кирәкле, илһамландыра торган очрашу булды. 

Ильвина Шакирова, Курса Почмак мәктәбе укучысы.