Тигр белән бүләк җыйдык

Сабантуй һәркемнең көтеп алган бәйрәме. Безнең авылда ул яшел чирәм белән капланган зур яланда үткәрелә. Бәйрәм алдыннан без дуслар белән бүләк җыешырга бардык. Бик күңелле уза ул. Бу йола «Сөлге җыю» дип атала. Бүләкләрне Сабантуй уеннарында катнашкан кешеләргә бирәләр. Без урам буйлап ат арбасына утырып бардык. Атыбызның кушаматы Тигр. Аны матур итеп бизәгәннәр иде. Апа-абыйлар гармун уйнап бардылар, без кушылып җырладык, биедек, халыкны бәйрәмгә чакырдык. Ерактан ук безнең гармун тавышларын ишетеп, кешеләр капка төпләренә чыкканнар. Йорт саен безнең килеп җиткәнне көтеп торалар иде, алдан ук бүләкләр әзерләп куйганнар. Яулыклар, тастымаллар, чәй сервизлары, тагын ниләр генә юк иде.
Шулай шаулап-гөрләп авыл урамнарын әйләндек. Күңелле булды. Уеннар да уйнадык, бик күп көлештек, сөйләштек. Ат арбасында йөрү үзе бер аттракцион. Тигрыбызга да кызык булды бугай.
Илина Вәлиева, Актаныш районы, Аккүз авылы.