«Татарча диктант» дөньякүләм белем тикшерү акциясендә катнаштык

2024 елның 9нчы ноябрендә Татарстан Республикасы Актаныш районы Меңнәр төп гомуми белем бирү мәктәбе укучылары «Татарча диктант» татар теленнән дөньякүләм белем тикшерү акциясендә катнаштылар.

Акциянең төп максаты татар теленә һәм мәдәниятенә игътибарны җәлеп итү, татар телен яратучыларны берләштерүгә юнәлтелгән. Бүгенге көндә «Татарча диктант» — Татарстан Республикасында, Россиядә һәм чит илләрдә яшәүче татарларны берләштерүгә ярдәм итүче акцияләрнең берсе.

6-9нчы сыйныф укучылары Шәриф Камалның «Матур туганда» әсәреннән өзек яздылар. Диктантның текстын туган (татар) теле укытучысы Фәррахова Рүзилә Рәсим кызы укыды. Башлангыч сыйныф укучылары әлеге күңелле чараны үзләренең чыгышлары белән тагы да ямьләндерделәр.

Акциядә катнашып, диктант язучы һәркем Бөтендөнья татар конгрессыннан рәхмәт хаты белән бүләкләнде.

Меңнәр төп гомуми белем бирү мәктәбенең укыту-тәрбия эшләре буенча директор урынбасары Маликова Алия Хәмит кызы.

Фотолар шәхси архивтан.