«Алтын каләм»дә беренче урын алу – максатым

Яшь иҗатчыларны барлаучы Республикакүләм «Алтын каләм» конкурсының район этабында быел да катнаштым.

Әлеге конкурсны мин ел да көтеп алам һәм бик теләп катнашам. Өченче ел рәткә әлеге конкурста төрле урыннар яуладым. Икенче һәм өченче дәрәҗәдәге дипломнарга ия булдым. Беренче урынга гына күтәрелеп булмый, конкурста оста телле, үткен сүзле талантлы, сәләтле яшьләр катнаша. 

Әлегә мин басма журналистика юнәлешендә катнашам, ләкин үземне телеведение өлкәсендә дә сынап карыйсым килә. Чөнки минем Илдар Кыямов, Гөлназ Сәфарова кебек талантлы алып баручы, диктор буласым килә.

Диктор сүзе латинчадан тәрҗемә иткәндә сөйләшүче дигәнне аңлата, кәгазьгә язылган ниндидер мәгълүматны, әдәби нәфис жанрдагымы яисә сәяси жанр булсынмы ул, дөрес интонация куеп сөйли. Алып баручы кешенең шушы сыйфатларына өстәп, төс-кыяфәтенә дә игътибар итәләрдер дип уйлыйм. Интервью алу да миңа ошый. Интервью алучы кеше әлеге өлкәдә тәҗрибәле булырга, әңгәмә дә кора белергә тиеш дип саныйм.

«Алтын каләм» конкурсы югалмасын, киләчәктә татар журналистикасы артта калмасын иде.

«Алтын каләм» конкурсы
Лаеклы олы үсешкә.
Талантлы язучылар,
Ышанам, катнаша синдә.
Ныклы адымнары белән,
Каләм тибрәтүчеләр
Атлыйлар киләчәккә,
Лачындай биеклеккә.
Әйдисең камиллеккә,
Маяк син бердәмлеккә!

Хаҗиева Гүзәл, Балтач районы, Г. Г. Гыйльметдинов исемендәге Смәел урта мәктәбенең 8 нче сыйныф укучысы.