"Смартфон – начар"

Очрашу башланганда ук залда телефон шалтыраган тавыш ишетелде. Познер телефоннарны сүндереп куюны сорады. “Минем телефоным юк, мин протест белдерәм. Яшь кешеләр 3-4 кеше бер-берсе белән очрашалар. Һәрберсе телефонга караган, сөйләшмиләр, хат язышалар”, - дип, күзәтүләрен уртаклашты.

Ләкин әңгәмә барышында Владимир Познерның үзенең дә кесә телефоны шалтырады. “Олег, бу бик ашыгычмы”, дип сораганнан соң, Познер телефонын сүндереп куйды.

Әңгәмә барышында Владимир Познердан смартфоннар, аның балаларга йогынтысы турында сорадылар.

“Ул минем өчен бары тик телефон. Шуннан артык түгел. Мин аның белән шалтыратам, миңа шалтыраталар. Мин аның белән китап укымыйм, фильмнар карамыйм. Текст язып та утырмыйм, мин, гомумән, алай тиз яза да алмыйм”, - диде ул.

Владимир Познер смартфоннарның олы кешеләр өчен куркыныч булмавын, ә балалар өчен зыянлы икәнен әйтте. “Миңа аның йогынтысы юк, телефон барлыкка килгәндә мин формалашкан кеше идем, аңа карап китап укудан да туктамыйм инде. Ләкин үсә торган балалар өчен ул зыянлы. Франциядә мәктәпкә смартфон алып килүне тыя торган закон бар. Башта, әлбәттә, гауга чыкты. Тик балалар шунда уйнап утырмасын, ә укысын өчен кирәк ул закон. Әлбәттә, телефоннарны бөтенләй тартып алып булмый инде. Ләкин телевизор карауны, телефон куллануны бик нык чикләргә кирәк. Бу катлаулы эш. Ләкин файдалы эш. Шул чакта бала башка кеше булып үсәчәк”, - диде ул.

Шул урында Владимир Познер үзенең улына китап укыганын искә төшерде. “Мин улым кечкенә вакытта “Өч мушкетер”ны укый башладым. Кичләрен укый идем. Аннары дәвамын укырга вакытым булмады. “Гафу ит, булдыра алмыйм, иртәгә укыйм”, дидем. Тик икенче көнне дә укымадым. Гафу ит, вакытым юк дидем, мин аны алдадым. Шуннан биш-алты көн узгач, улым күзе китаптан аерылмыйча укый башлады. Аңа 60 яшь инде, ул әле дә аерылмыйча укый”, - диде ул.

Владимир Владимирович Познер – журналист, теле һәм радио алып баручы, Россия телевидение академиясенең беренче президенты, язучы. Ул Беренче каналда “Познер” авторлык программасын алып бара. 1934 елның 1 апрелендә Франция башкаласы Парижда туган.

Автор: Ләйсән ХАФИЗОВА

Фото: автор

Бу хакта тулырак: https://intertat.tatar/seyeset/k-zgeg-karap-bite-t-ker-se-kilm-sen-vladimir-pozner-zhurnalistlar-s-yas-t-m-kt-p-tel-turynda/